కొత్త ఎన్నికల కమిషనర్‌గా రిటైర్డ్ బ్యూరోక్రాట్ అరుణ్ గోయల్

ద‌ర్వాజ‌-న్యూఢిల్లీ

Election Commissioner Arun Goel: రిటైర్డ్ బ్యూరోక్రాట్ అరుణ్ గోయల్‌ను భారత రాష్ట్రపతి శనివారం కొత్త ఎన్నికల కమిషనర్‌గా నియమించారు. 1985-క్లాస్ పంజాబ్ క్యాడర్ అధికారి అయిన గోయెల్, ప్రధాన ఎన్నికల కమిషనర్ రాజీవ్ కుమార్, ఎన్నికల కమిషనర్ అనుప్ చంద్ర పాండేతో క‌లిసి ఎన్నికల ప్యానెల్‌లో పని చేస్తారు. భారీ పరిశ్రమల కార్యదర్శిగా అరుణ్ గోయెల్ స్వచ్ఛందంగా పదవీ విరమణ చేసిన ఒక రోజు తర్వాత, గోయల్‌ను ఎన్నికల కమిషనర్‌గా నియమిస్తున్నట్లు ప్రభుత్వం ప్రకటించింది. తన అధికారిక పదవీ విరమణ తేదీకి ఒక నెల ముందు, ఐఏఎస్ అధికారి స్వచ్ఛంద పదవీ విరమణ చేశారు.

“రాష్ట్రపతి కార్యాల‌యం ఓ ప్ర‌క‌ట‌న‌లో అరుణ్ గోయెల్, IAS (రిటైర్డ్.) (PB: 1985) ఎన్నికల కమీషన్‌లో ఎన్నికల కమీషనర్‌గా నియమితులైనందుకు రాష్ట్రప‌తి ద్రౌప‌ది ముర్ము సంతోషిస్తున్నారు.. ఆయన పదవీ బాధ్యతలు స్వీకరించిన తేదీ నుండి నియామ‌కం అమలులోకి వస్తుంది” అని తెలిపింది. ఈ ఏడాది మేలో సుశీల్ చంద్ర ప్రధాన ఎన్నికల కమిషనర్ పదవి నుంచి వైదొలిగి రాజీవ్ కుమార్ బాధ్యతలు చేపట్టారు.