దర్వాజ-న్యూఢిల్లీ
PM Modi on Deep Fake Technology: రష్మిక మందన్న తర్వాత నటి కాజోల్ కూడా డీప్‌ఫేక్ వీడియో బాధితురాలిగా మారింది. ఆమెకు సంబంధించిన ఒక డీప్ ఫేక్ వీడియో సోషల్ మీడియాలో వైరల్ అవుతోంది. డీప్ ఫేక్ టెక్నాల‌జీపై స‌ర్వ‌త్రా ఆందోళ‌నల మధ్య ప్రధాని నరేంద్ర మోడీ స్పందించారు.
కృత్రిమ మేధ యుగంలో సాంకేతిక పరిజ్ఞానాన్ని బాధ్యతాయుతంగా వినియోగించుకోవాలని ప్రధాని నరేంద్ర మోడీ అన్నారు. ముఖ్యంగా ఆర్టిఫిషియల్ ఇంటెలిజెన్స్ రంగంలో తాజా సాంకేతిక అప్ గ్రేడ్ లు గ్లోబల్ నార్త్, గ్లోబల్ సౌత్ మధ్య అంతరాన్ని పెంచకూడదనే న్యూఢిల్లీ వైఖరిని ఆయన ఎత్తిచూపారు. ఆర్టిఫిషియల్ ఇంటెలిజెన్స్ కాలంలో సాంకేతిక పరిజ్ఞానాన్ని బాధ్యతాయుతంగా వినియోగించుకోవాల్సిన అవసరం ఉందన్నారు. దీన్ని మరింత ప్రోత్సహించడానికి వచ్చే నెలలో భారత్ ఆర్టిఫిసియాయ్ గ్లోబల్ పార్టనర్ షిప్ సమ్మిట్ ను నిర్వహిస్తుందని ప్రధాని తన ప్రసంగంలో పేర్కొన్నారు.
ప్రముఖ గ్లోబల్ సౌత్ నాయకుల భాగస్వామ్యంతో వర్చువల్ గా భారత్ ఆతిథ్యమిస్తున్న రెండో వాయిస్ ఆఫ్ గ్లోబల్ సౌత్ సమ్మిట్ లో ప్రధాన మంత్రి ప్రసంగించారు. అంతకు ముందు గ్లోబల్ సౌత్ కంట్రీస్ ఫర్ ఎక్సలెన్స్ గ్లోబల్ సెంటర్ ఫర్ ఎక్సలెన్స్ ‘దక్షిణ్’ను ఆయన ప్రారంభించారు. 2023 జనవరిలో నిర్వహించిన తొలి వీవోజీఎస్ఎస్ లో ఈ సంస్థను ఏర్పాటు చేయాలనే ప్రతిపాదనను ప్రధాని ముందుకు తెచ్చారు.
దేశంలో డీప్ ఫేక్స్ దుర్వినియోగానికి సంబంధించిన అనేక ఉదంతాలు వెలుగుచూసిన నేపథ్యంలో ప్రధాని వ్యాఖ్యలు ప్రాధాన్యం సంతరించుకున్నాయి. తాజాగా బాలీవుడ్ నటి రష్మిక మందన్నకు సంబంధించిన ఓ ఫేక్ వీడియో సోషల్ మీడియా ప్లాట్ఫామ్ ఎక్స్ లో వైరల్ గా మారింది. ఆ తర్వాత ఆ వీడియో రష్మిక మందన్నది కాదని, అమెరికాకు చెందిన ఇన్ఫ్లుయెన్సర్ జారా పటేల్ వీడియోపై సైబర్ నేరగాళ్లు ఆమె ముఖాన్ని ఉంచారని తేలింది.
ఆ త‌ర్వాతి రోజే కత్రినా కైఫ్ డీప్ ఫేక్ వీడియో వైరల్ అయింది. ఆమె రాబోయే చిత్రం ‘టైగర్ 3’ నుండి డిజిటల్ గా మార్చబడిన చిత్రం ఆన్ లైన్ లో ప్రత్యక్షమైంది. ఒరిజినల్ ఫోటోలో బాలీవుడ్ స్టార్ టవల్ ధరించిన స్టంట్ ఉమెన్ తో పోరాడుతుండగా, ఎడిట్ చేసిన వెర్షన్ లో ఆమె టవల్ కు బదులుగా లో కట్ వైట్ టాప్, మ్యాచింగ్ బాటమ్ ధరించినట్లు చూపించారు. అలాగే, ప్రముఖ భార‌తీయ నటి కాజోల్ కు సంబంధించిన డీప్ ఫేక్ వీడియో కూడా నెట్టింట వైరల్ అవుతోంది.