దర్వాజ-ముంబయి

Mumbai traffic police: పిలియన్ రైడర్లకు కూడా హెల్మెట్ తప్పనిసరి చేస్తూ ముంబై ట్రాఫిక్ పోలీసులు బుధవారం నోటిఫికేషన్ జారీ చేశారు. ఈ నిబంధనలు ఉల్లంఘించిన వారిపై చర్యలు తీసుకుంటామని హెచ్చరించారు. ఇప్ప‌టి నుంచి బైక్‌ల పై వెనుక కూర్చున్న వారు అంద‌రూ హెల్మెట్ ధ‌రించాల్సిందేన‌ని పేర్కొన్నారు. ఈ నిబంధన 15 రోజుల తర్వాత అమలులోకి వస్తుందని, ఆ తర్వాత ట్రాఫిక్ అధికారులు ఉల్లంఘించిన వారిపై చర్యలు తీసుకోవడం ప్రారంభిస్తారని ఓ ఉన్న‌తాధికారి తెలిపారు.

ముంబ‌యి ట్రాఫిక్ పోలీసుల నోటిఫికేషన్ ప్రకారం.. నగరంలో చాలా మంది ద్విచక్ర వాహనదారులు హెల్మెట్ ధరించడం లేదని మరియు ట్రాఫిక్ నిబంధనలను ఉల్లంఘిస్తున్నారని ట్రాఫిక్ పోలీసులు గుర్తించారు. ప్రస్తుతం హెల్మెట్ లేని వాహనదారులపై ట్రాఫిక్ పోలీసులు రూ.500 జరిమానా విధించ‌డం లేదా వారి లైసెన్సులను సస్పెండ్ చేస్తున్నారు. కాగా, 15 రోజుల తర్వాత, హెల్మెట్ లేకుండా దొరికిన పిలియన్ రైడర్లకు అదే జరిమానా విధించబడుతుందని అధికారి తెలిపారు.

ఇదిలా ఉండగా ట్రాఫిక్ ఉల్లంఘనల సంఖ్య పెరిగింది. దీంతో ముంబ‌యిట్రాఫిక్ పోలీసులు కఠిన చర్యలు తీసుకున్నారు. గత కొద్ది రోజులుగా ఒకరిద్దరు కాదు ఏకంగా ఆరుగురు వ్యక్తులు స్కూటర్‌పై ప్రయాణిస్తున్న వీడియో వైరల్‌గా మారింది. దురదృష్టవశాత్తు, స్కూటర్ వెనుక కూర్చున్న యువకుడు ఒక యువకుడి భుజంపై కూర్చొని కనిపించాడు. అంధేరీ వెస్ట్‌లోని స్టార్ బజార్ దగ్గర ఈ వీడియో చిత్రీకరించబడింది. సోష‌ల్ మీడియాలో వైర‌ల్ గా మారింది. దీని గురించి అటుగా వెళ్తున్న ఓ వ్య‌క్తి ముంబ‌యి ట్రాఫిక్ పోలీసులకు వీడియోను షేర్ చేస్తూ.. చ‌ర్య‌లు తీసుకోవాల‌ని కోరారు.