దర్వాజ-అంతర్జాతీయం
SriLanka Economic Crisis: శ్రీలంక ఆర్థిక సంక్షోభం.. దేశంలో తీవ్ర ప‌రిస్థితుల‌కు కార‌ణం అవుతోంది. పెద్ద ఎత్తున నిర‌స‌న‌లు కొన‌సాగుతున్నాయి. ఈ క్ర‌మంలోనే తాత్కాలిక అధ్యక్షుడిగా, ప్రధానమంత్రి రణిల్ విక్రమసింఘే బాధ్య‌త‌లు తీసుకుని శ్రీలంకలో బుధవారం నాడు ఎమ‌ర్జెన్సీ (అత్యవసర పరిస్థితి) ని ప్రకటించారు. అధ్యక్షుడు గోటబయ రాజపక్సే దేశం నుండి పారిపోయిన కొన్ని గంటల తర్వాత దేశంలో పెద్ద ఎత్తున నిర‌స‌న‌లు చెల‌రేగాయి.
శ్రీలంక తాజా అప్‌డేట్స్ ఇలా ఉన్నాయి..
1. పెరుగుతున్న నిరసనలను అరికట్టడానికి కొలంబోతో సహా పశ్చిమ ప్రావిన్స్ అంతటా నిరవధిక కర్ఫ్యూ విధించారు. ఆస్తుల‌ను ధ్వంసం చేస్తూ.. హింసతో ప్రవర్తించే వారిని అరెస్టు చేయాలని భద్రతా బలగాలను ప్రధాని ఆదేశించినట్లు ఆయన కార్యాలయం తెలిపింది.
2. శ్రీలంక రాజధాని కొలంబో వీధుల్లో వేలాది మంది నిరసనకారులు గోటబయ రాజపక్సే మాల్దీవులకు పారిపోయారని వార్తలు రావడంతో వెంటనే రాజీనామా చేయాలని డిమాండ్ చేశారు.
3. ప్రధాని కార్యాలయంలోకి ప్రవేశించడానికి ప్రయత్నించినప్పుడు ప్రజలను చెదరగొట్టడానికి భద్రతా బలగాలు బాష్పవాయువు షెల్లు, వాటర్ ఫిరంగులను ప్ర‌యోగించిన దృశ్యాలు మీడియాలో క‌నిపించాయి. విక్రమసింఘే ఇప్పటికే రాజీనామా చేసి అఖిలపక్ష ప్రభుత్వాన్ని ఏర్పాటు చేసేందుకు సిద్ధంగా ఉన్నారని స‌మాచారం.
4. అధ్యక్షుడు రాజపక్సే, అతని భార్య, ఇద్దరు అంగరక్షకులు గత రాత్రి కొలంబో అంతర్జాతీయ విమానాశ్రయం నుండి మేల్-బౌండ్ మిలిటరీ విమానంలో బయలుదేరారు. ఆయన తమ్ముడు, మాజీ ఆర్థిక మంత్రి బాసిల్ రాజపక్సే కూడా దేశం విడిచి వెళ్లిపోయారని నివేదికలు పేర్కొన్నాయి.
5. రాజపక్సే తమను గత రాత్రి విమానం కోసం అభ్యర్థించారనీ, అతనికి ఒక విమానం అందించడానికి రక్షణ బలగాలు సిద్ధంగా ఉన్నారని తెలిపిన‌ట్టు ఎన్డీటీవీ నివేదించింది. అధ్యక్షుడిగా, రాజపక్సే రక్షణ దళాలకు సుప్రీం కమాండర్‌గా కొనసాగుతున్నారు.
6. మాల్దీవులకు పారిపోయిన అధ్యక్షుడు రాజపక్సే, అతని భార్య, అంగరక్షకులను పోలీసు ఎస్కార్ట్‌లో గుర్తు తెలియని ప్రదేశానికి తరలించినట్లు మాలేలోని విమానాశ్రయ అధికారి తెలిపారని మీడియా రిపోర్టులు పేర్కొంటున్నాయి.
7. అధ్యక్షుడు రాజపక్సే, అతని సోదరుడు బాసిల్ పారిపోవడానికి భారతదేశం సహాయం చేసిందనే వార్తలను శ్రీలంకలోని భారత హైకమిషన్ బుధవారం నాడు తోసిపుచ్చింది. “శ్రీలంక నుండి ఇటీవల నివేదించబడిన @gotabayar @Realbrajapaksaల ప్రయాణాన్ని భారతదేశం సులభతరం చేసిందని నిరాధారమైన, ఊహాజనిత మీడియా నివేదికలను హైకమిషన్ నిర్ద్వంద్వంగా ఖండించింది. శ్రీలంక ప్రజలకు భారతదేశం మద్దతును కొనసాగిస్తుందని పునరుద్ఘాటించింది” అని ట్వీట్ చేసింది.
8. అధ్యక్షుడిగా, గోటబయ రాజపక్సే అరెస్టు నుండి మినహాయింపు పొందారు. నిర్బంధానికి గురికాకుండా ఉండేందుకు రాజీనామా చేసే ముందు దేశం విడిచి వెళ్లాలని భావించినట్లు భావిస్తున్నారు.
9. బుధవారం రాజీనామా చేస్తానని, శాంతియుతంగా అధికార మార్పిడికి మార్గం సుగమం చేస్తానని హామీ ఇచ్చారు. శ్రీలంక రాజకీయ పార్టీలు జులై 20న అఖిలపక్ష ప్రభుత్వాన్ని ఏర్పాటు చేసి కొత్త అధ్యక్షుడిని ఎన్నుకునే ప్రయత్నాలను ముమ్మరం చేశాయి. అఖిలపక్ష ప్రభుత్వం కైవసం చేసుకోవడానికి సిద్ధమైన తర్వాత తాను పదవీ విరమణ చేస్తానని ప్రధాని విక్రమసింఘే ప్రకటించారు.
10. అంతకుముందు, ఇమ్మిగ్రేషన్ అధికారులు తమ ప్రయాణాన్ని క్లియర్ చేయకపోవడంతో పాటు ఇతర ప్ర‌యాణికులు నిరసన వ్యక్తం చేయడంతో గోటబయ రాజపక్సే, బాసిల్ రాజపక్సే ఇద్దరూ దేశం విడిచి వెళ్ళడంలో విఫలమయ్యారు. కాగా, వీరి కుటుంబ పాల‌న, ఆర్థిక వ్యవస్థను రాజపక్సేలు తప్పుగా నిర్వహించారనే ఆరోప‌ణ‌ల‌తో దేశంలో పెద్దఎత్తున నిర‌స‌న‌లు కొన‌సాగుతున్నాయి.