Miss World 2025: మిస్ వరల్డ్ గా ఓపాల్ సుచతా చువాంగ్‌శ్రీ

Darvaaja – Hyderabad

Miss World 2025: మిస్ వరల్డ్ 2025 గా ఓపాల్ సుచతా చువాంగ్‌శ్రీ (Opal Suchata Chuangsri) నిలిచారు.శనివారం (2025 మే 31) హైదరాబాదు నగరానికి ప్రత్యేక గౌరవాన్ని తీసుకువచ్చిన గొప్ప సాయంత్రం. ప్రపంచంలోని అందగత్తెల అందాన్ని, బాధ్యతను, సాంస్కృతిక సమన్వయాన్ని ప్రతిబింబించే మిస్ వరల్డ్ 2025 (Miss world 2025) పోటీ అద్భుతంగా ముగిసింది. ఈ వేడుకలో థాయిలాండ్‌కు (Miss Thailand) చెందిన ఓపాల్ సుచతా చువాంగ్‌శ్రీ ప్రపంచ సుందరిగా ఎంపికై, ప్రపంచ వేదికపై తన దేశానికి గౌరవం తీసుకొచ్చింది.

ఈ గ్లామరస్ వేడుక హైటెక్స్ ఎగ్జిబిషన్ సెంటర్‌లో జరగడం విశేషం. ప్రపంచవ్యాప్తంగా ఉన్న 108 దేశాల ప్రతినిధులు ఇందులో పాల్గొన్నారు. ప్రాచీన సంప్రదాయాల నుంచి ఆధునిక ఫ్యాషన్ వరకూ ప్రతీ మూమెంటు ప్రేక్షకులను ఆకట్టుకుంది.

ఈవెంట్‌కు కో-హోస్టులుగా 2016 మిస్ వరల్డ్ స్టెఫనీ డెల్ వాలే, ఇండియన్ ప్రెజెంటర్ సచిన్ కుంబార్ వ్యవహరించారు. బాలీవుడ్ తారలు జాక్విలిన్ ఫెర్నాండెజ్, ఇషాన్ ఖట్టర్‌ల ఆకర్షణీయ ప్రదర్శనలు రాత్రిని మరింత రంగురంగులుగా మార్చాయి.

అంతర్జాతీయ డిజైనర్ అర్చనా కొచ్చర్ రూపొందించిన ప్రత్యేక గౌన్లలో 108 మంది ఔత్సాహికులు తొలిసారిగా ర్యాంప్ పై మెరిశారు. ఈ పోటీలో ప్రతి ఖండానికి చెందిన టాప్ 10 ఆధారంగా 40 మంది క్వార్టర్ ఫైనలిస్టులు ఎంపికయ్యారు. చివరగా మిగిలిన నాలుగు ఖండాల టాప్ కంటెస్టెంట్లలో నుంచి విజేతగా ఓపాల్ సుచతా చువాంగ్‌శ్రీ (Miss Thailand)  ఎంపికయ్యారు. ఆమెతోపాటు మిస్ ఎథియోపియా హస్సెట్ డెరేజె, మిస్ పోలాండ్ మాయా క్‌లాజ్డా, మిస్ మార్టినిక్ ఔరేలీ జోయచిమ్ ఫైనలిస్టులుగా నిలిచారు.

అందం, ఆత్మవిశ్వాసానికి నిర్వచనం ఓపాల్ సుచతా చువాంగ్‌శ్రీ

మార్చి 20, 2003న థాయిలాండ్‌లోని ఫుకెట్ నగరంలో జన్మించిన ఓపాల్ (Opal Suchata Chuangsri) హోటల్ వ్యాపారానికి చెందిన కుటుంబానికి చెందినవారు. తై, ఇంగ్లీష్, చైనీస్ భాషల్లో ప్రావీణ్యం ఉన్న ఆమె, బ్యాంకాక్‌లోని ప్రతిష్టాత్మక త్రియామ్ ఉదోం సుక్సా పాఠశాలలో అంతర్జాతీయ సంస్కృతిపై చైనీస్ స్టడీస్‌లో చదువుకున్నారు. ప్రస్తుతం థామాసాట్ యూనివర్సిటీలో పాలిటికల్ సైన్స్‌లో గ్లోబల్ అఫైర్స్ విభాగంలో చదువుతున్నారు.

16 ఏళ్ల వయసులో ఓపాల్‌కు బీనైన్ బ్రెస్ట్ లంప్‌ను శస్త్రచికిత్స ద్వారా తొలగించారు. ఆ అనుభవమే ఆమెను “Opal For Her” అనే అవగాహన కార్యక్రమాన్ని ప్రారంభించేలా చేసింది. ఇది బ్రెస్ట్ హెల్త్‌పై చైతన్యం కల్పించే ప్రయత్నం. మహిళల ఆరోగ్యంపై అవగాహన, స్వీయ పరిణామంపై ఓపాల్ చేసే ఈ పని, ఆమె మిస్ వరల్డ్ విజేతగా ఎంపిక కావడానికి ప్రధాన కారణాల్లో ఒకటి.

భారతదేశానికి ప్రత్యేక గౌరవం

ఇతర దేశాలకు సాంస్కృతిక, సామాజిక, నైపుణ్య విలువలను తెలియజేసే ఈ వేదిక, మొదటిసారిగా హైదరాబాదులో జరగడం తెలంగాణకు, భారతదేశానికి గర్వకారణం. ఇది దేశాన్ని గ్లోబల్ బ్యూటీ, కల్చర్, మిషన్ డ్రివెన్ ప్లాట్‌ఫామ్‌లలో ఒక ముఖ్య కేంద్రంగా నిలబెట్టింది.

మిస్ వరల్డ్ 2025 పోటీ, అందం అంటే కేవలం బాహ్య రూపమే కాదు, వ్యక్తిత్వం, సామాజిక బాధ్యత, అవగాహన కలగలిపిన సంపూర్ణ వ్యక్తిత్వానికి ఇచ్చే గౌరవంగా నిలిచింది. ఓపాల్ సుచతా చువాంగ్‌శ్రీ విజయం, ప్రపంచ మహిళలకు ప్రేరణగా నిలుస్తుంది.